النيل والشجرة والصخرة

النيل , والشجرة , والصخرة ...

وبت حلوة قاعدة

ومنكسرة ...

وواد مهندم قاعد

وبيعاكس ...

وراجل كبير قاعد

وبيراقبه ...

البت قعدة يا عيني

مرعوبة ...

والواد عنيه بشرارها

هتولع ...

وهناك بعيد عنهم كده

شوية ...

قاعدين اتنين

ومنسجمين ...

-:يقول بحبك

ترد عليه وشوق الدنيا

في عنيها ...

بحبك من زمان واحلف

تنزل بعيد

عن الكراسي واللي

قاعدينها ...

تلاقي واحد ماسك في صنارته

ومتبت ...

مستني حظه يجيلوا

م الميه ...

في سمكة يكون في بطنها

خاتم ...

يدعكه ويلاقي عفريته طالع من جواه

وبينادي ...

أأمر يا سيدي , أمرك مطاع ...

أأمر تلاقي أمرك

فريضة ...

ودول هناك في مركب بعيد ...

متزينة بعقود من الفرحة ...

وعروسة وعريسها

جمعهم الشوق واللهفة

وبدأوا حياتهم من الميه

-:مأذون قاعد وبيقول

"صلوا على النبي وسموا"

وادعوا لعرايسنا وهنوا

ومعازيم بترقص من الفرحة

وبيدعوا لعاريسنا ويهنوا

وهناك في اليمه التانية

م الميه ...

واقف فلاح وف إيده

الفاس ...

وعرقه نازل من وشه

بيروي الأرض

مع الميه ...

واقف يغني

يا أرضي يا ست الخير ...

والله ما أفرط فيكي

حتى لو جبولي كنوز

الدنيا والآخرة ...

كنت أنا ومعايا

نفسي ...

وكان معايا كام كتاب ...

وكمان جورنال ...

ومن الجمال

قلبي اتخطف

وقولت أدون

واكتب

عن حبي

لـ النيل , والشجرة , والصخرة

يا جماعة دي مجرد حجات كدة خبطتني في دماغي من منظر كورنيش المنيا ... بس للأسف مكنش معايا حد أصورلكم الجمال الغير طبيعي اللي عندنا .... يعني ممكن تسموها خواطر , تسموها شعر , تسموها زي ما تسموها المهم أني حاولت أعبر عن جزء ولو صغير , عن حبي لكورنيش المنيا , مش عارف ملقتشي صور للكورنيش عندى بس جبت الصورة دي لغاية ما أصورلكم الكورنيش على مزاج بقي .... يعني الصورة دي مش في المنيا "علشان محدش يفهم غلط بقي" والسلام ختام

حمادة زيدان

لبـــــــــنان مبروووووك

إلي كل زلمة وصبية لبنانية ... إلي كل فرد لبناني "سني , شيعي , مسيحي" مبروووووك الوحدة , إلي أحلى وأرقى شعوب العرب مبرووووك الوحدة , يشهد التاريخ عليكم بأنكم أبطال وخلقتكم لكي تكونوا أبطال .... مبروك لبنان , مبروك لبنان




أنا والله مش عارف في علاقة بتجمعني بالبلد الجميل ده , يمكن لحبي الجامد للفن اللبناني , يمكن لعشقي للحرية الموجودة في لبنان , يمكن لحبي للثقافة اللبنانية والشامية , ويمكن لحبي في اللهجة اللبنانية , والله مش عارف , بس المهم أنا بحبها , وبزعل عليها جداً في أزامتها , وبفرحلها أوىىىى في أنتصارتها




ربنا يديم المحبة في قلوب اللبنانين , ويخليهم قوة واحدة , ويبعد عنهم الفتنة يارب , أحب أهدى أغلي سلام لكل لصدقاتي في لبنان رشا , وزينة وبقولهم




راجع راجع يتعمر راجع لبنان




ومش هيرجع غير بيكم أرجوكم حافظوا عليه

معلش يا جماعة أنا كنت ناوي أنزل بوست اهداء للبنان وبس ولكن النهاردة حصلتلي حاجة غريبة قولت أحكيها ... طبعاً أنتوا عارفين فيلم النوم في العسل للعبقري عادل إمام واللي كان إخراجه من نصيب العبقري شريف عرفة وللمؤلف العظيم وحيد حامد أدخل بقي عالموقف ... الفيلم كان شغال والصراحة ملحقتوش , بس لحقت أخر مشهد لما عادل إمام أخد الناس وفضل يقول آآآآآآآه مش عارف ليه عنيا دمعت , ومش عارف ليه حسيت إني عاوز أفط جوه الشاشة واصرخ معاهم واقول آآآآآآآآآآآآآآآآآآآآآآآه من جوة قلبي , والله الشعب المصري كلوا مش محتاج أكتر من كلمة آآآآآآآآآآآآآآآآه في وش النظام المصري تقيل الدم ده والله يا جماعة نفسي أصرخ وكل الناس تصرخ معايا ونقول آآآآآآآآآآآآآآآآآآآآآآآآآآآآآآآآآآآآآآآآآآه

تحياتي للجميع وخاصة الشعب اللبناني الحبيب

المستحي

معلشي يا جماعة القصيدة باظت ... وكتبتها تاني ... هى قصيدة للمبدع طلال فيصل من ديوانه الفظيع الملائكة لا تشاهد الأفلام الإباحية القصيدة اللي اخترتها أسمها المستحي بصراحة القصيدة حاسس أنها بتتكلم عني وعن كتير من الشباب , في حجات كتير غلط بنعملها , وحجات كتير صح مش بنعملها , وكتير بيكون السبب مش "إيماني" لا بتكون حجات تانية منها العادات والتقاليد , والعرف , والخجل كما حدث لطلال في قصيدته , هسيبكم مع القصيدة ويارب تعجبكم

المستحي

ما بين رصيفٍ .. ورصيفٍ

تتلاقي الأعين في وجلِ

جارتُنا الحلوةُ ...

ألمحها ...

والشارع بحر من علِلِ

يا جسدا ليس به غلطة ..

يا وردا .. يا باقة فلّ

يا أحلى بنتٍ في الدنيا ...

انصرفي ......

هذا خيٌُر لي

يا ربي ..

يا ربي اصرفها عنٌّي

- لم يستجب الله لقولي -

فأرها ...

تدونو .....

وأراني مختبئاً أهرب في ظلّي

تتحرك نحوي ..

كحصانٍِ وتميل فأفزع للميلِ

وقع المحظورُ ونادتني

..أين سأذهبُ ..؟

مَا مِن سُبُل

تقتربُ .....

فأبصر بسمتها

(كم أخشي من رد الفعلِ)

فارتب ذهناً مضطرباً

وأعد كلاماً للقولِ

إني مرتبكُ . مرتبكُ ..

مثلَ العصفور المبتلَّ

أسمعها تنطق اشياءً

فتتوه الكلماتُ بعقلي

كلماتي حيرى تائهةُ

(كلماتٌ تبحثُ عن جُمَل)

تتكلمُ ....

تضحكُ .......

تتساءلُ .. تفتحُ موضوعاً للوصلِ

وأنا .... كجدارٍ من خشبٍ

لم أتحرك ..

لم أنفعلِ

:هتفت تسألني ضاحكةً

!لم وجهك محمر قل لي؟

وتمر اللحظاتُ .. علينا

وتمر دقائقُ .. كالذلّ

:-لم تلبث قالت - واجمةً

تبدو لي مثل المنشغلِ

وانصرفت عني محبطةً .. من صمتي المطبقِ

من فشلي

أخبطُ جبهةَ رأسي غيظاً ...

وبرئتي بركانٌ يغلي

حتى لم أطلب هاتفها

(هل يوجد في الدنيا مثلي)

يا فتنةُ ..... أعترفُ بذنبي

وحلالٌ في شرعك قتلي

تركتني الفاتنةُ كأني

جرحٌ في خاصرِة الأزلِ

تركتني مع ألفَ سؤالٍ

يجرح أعماقي كالنصلِ

خطأ مختلط بصوابٍ ..

وحرامٌ تائُه في حِلٌ

الجرأة ليست في طبعي

والرغبةُ .....

والرغبةُ تملؤني كلَّي

والتقوى ..

هي محض ستارٍ يخفي المشكلة بلا حَلَّ

لا داعي أن ألعب دوراً ....

أو أرسم نفسي كالبطلِ

ولأعترف الآن حزيناً

فلعلي أرتاح ..... لعلَّي

لم يمنعني اللهُ ... ولكن

يمنعني ..

!ما يدعي .. خجلي

مش عاوزين النهاردة

النهاردة وانا باخد لفتي عالفيس بوك ... وبحكم أني جديد عالفيس بوك ... وبردوا بحكم أني أديلي فترة مش بسمع تلفزيون ولأسباب عادية يعني ... المهم أدخل في الموضوع

المهم لقيت جروب عالفيس بوك ... عليه صورة عمرو دياب علامة فاى أعتقد كده... أنا بصراحة مأخدتش ولا اديت , وقولت تلاقيهم العيال اللي بتحب الواد تامر حسني , ومكنتش بدخل على الجروب خالص.

جيت النهاردة دخلت عالجروب "ويارتني ما دخلت" لقيت الجروب سياسي كالعادة واللي صممه يا تري مصممه ليه !!!! طلع علشان أخوانا عمرو دياب غنى أغنية لمبارك في عيد ميلاده ... المهم بردوا ما أخدتش ولا ادايت بحكم أني مشفتش الغنوة

ودخلت بعدها بحسن نية والله أشوف الغنوة

http://www.youtube.com/watch?v=dauXDAO1FOo

وبسببها قعدت عالكرسي ومش عارف أقوم

قال السيد عمرو دياب بيقول عالريس أنه "واحد مننا" هو مين ده يا عمور اللي واحد مننا

يمكن يا جماعة "مننا" دي شعب تاني بيغنيلوا سي عمرو , ولا يمكن هو بيغني لرئيس تاني غير الزفت اللي حاكمنا , ولا يمكن عمرو وهو بيغنيها كان شارب سيجارة بنجو ...

المهم الله أعلم باللي خلى عمرو دياب يغني الغنوة

بس أنا لما سمعتها قولت والله أعمل بوست وانشر فيه الجروب

وطظ فيك يا عمرو

وابقي تعالا قابلني لو اشتريتلك البوم بعد كده

ملحوظة

"أنا عمري من يوم ما اتولدت اشتريت البوم لعمرو دياب"

المهم أعلنوها صريحة

أعلنوها مدوية

هنقاطع عمرو دياب , ومش هنسمعوا تاني

ولو عاوزنا نسمعوا

ممكن يعتذر في غنوة , تكون من كلمات عمنا "نجم" أو عمنا "علي سلامة" ويكون فيها أعتذار لكل السمعيه

لو عاوز الجروب أضغط عالصورة

مصري للبيع

الصورة منقولة
نظراً لحالة العطل الفني لدماغي من الحر
أنا جبتلكم حاجة قديمة من مدونتي التانية و
يا رب تعجبكم

درجة الحب ما بين المواطن المصري , والنظام المصري وصلت إلي مرحلة جميلة , فأصبح الرجال منذ بداية يومهم إلي نهايته , بيدعوا على النظام سوري بيدعوا للنظام , وأصبح النظام يبادلهم الدعاء بالدعاء , حتى توصل النظام المصري لحل لهذه المشكلة ووقف كمية الحب المبالغ فيها من أفراد الشعب للنظام , وكان ذلك الحل في هذا المؤتمر
مقدمة المؤتمر فلتتفضل بالتحدث
في سبق يحدث لأول مرة في العالم , وفي إنجاز جديد لحكومة نظيف قررنا بيع الإنسان المصري , وإليكم رئيس الوزراء ليحدثكم عن تلك الصفقة "
والله إحنا كوزارة لقينا المصريين بياخدوا خدمات كتير , ومش بيدولنا أى شيء , يعني بياخدوا ومش بيدوا , لذلك وجدنا في بيعهم الحل الأمثل هو بيعهم وتشريدهم في البلاد "علشان يعني يشتغلوا ويجيبوا فلوس للحكومة المسكينة" أما عن ميزانية الصفقة فهي كبداية 500 ألف جنية عالراس ..... طبعاً في كتير ممكن هايستغلى السعر دة , بس دة والله أرخص الأسعار في العالم , يعني شوفوا في الصين مثلا , الكبد بيتباع لوحدية بملايين ..... تخيلوا بقي إنسان كامل زى الفل "يمكن يكون عنده شوية أمراض , يعني مثلاً عنده فشل كلوى , على شوية كبد , وممكن تلاقي شوية أنميا " بس دة مش بيأثر على قدرته عالشغل , المصري "حمار" شغل , ياللا هانبدأ المؤتمر وبعدها المزاد , وهانشوف هايرسي اللوط علي مين......................
صحفي أمريكي :سيدي الوزير "ممكن أعرف المصري لمّا هايتباع , هايكون بنفس السلبية , والخمول , والكسل , واللامبالاة , اللي هو فيهم ولا هايتعدل علي وهايكون مطيع , "أحنا في أمريكا عاوزينه يكون إيجابي بس في كرهه للإرهاب" غير كدة يكون سلبي جدا ".
رئيس الوزراء : المصري بيتعود على طباع البلد اللى هو فيها , بس لو أنت أدتلوه اللقمة والهدمة ولا مؤاخذة "الحتة الطرية" هايكون معاك إشطي بالمهلبية , وهاينفض ويتظبط عالآخر".
صحفي صيني :عاوز اسئلك هو السعر موحد , يعني الدكتور زى الحرامي والمهندس زى العربجى , ولا في فرق!!!
رئيس الوزراء :طبعاً في فرق , بس على العموم كل الجماعة الدكاترة والمهندسين سابوا البلد , واللى موجودين هانزود سعرهم شوية , وفي منهم هانخليهم في البلد "يمكن حد من الحكومة يكون عيان ولا حاجة هما يعالجونا , وكمان لو حبينا نبني شوية بيوت للحكومة هانخلي المهندسين يبنلونا البيوت" والباقي هانبيعهم بس بسعر غالي شوية ".
صحفي اسرائيلي : أنت يا زفت يا وزير , أنتوا هاتبيعوا المصريين واحنا هانشتري , بس مش عاوز كلب مصري يفضل في البلد دى , أحنا زى ما أشترينا الأرض , هانشتري الناس إللي عالأرض "علشان في حديث من نبيكم بيقول أنكم خير جنود الأرض " هانشتريكم علشان ما يبقاش في جنود , ياللا أنا حكومتي بعتاني , هانشتري الراس بمليون دولار , لخصوا وبيعوا".
رئيس الوزراء : قررنا بدء المزاد , وقررنا أنه الصفقة راحت لأصدقائنا اليهود , وألف مبروك ليهم على الشعب المصري
قرار من رئيس الوزراء الأسرائيلي
بعد قيام الحكومة الأسرائلية بشراء الشعب المصري قررنا "أعتقال الحكومة المصرية , وإعدام كل ممثليها "
إلي هنا أنتهي المؤتمر , وانتهت معاه حكاية شعب ونظام بيموتوا في حب بعض
حمادة زيدان

نقطة ميه

يا تري يا نقطة الميه ...

هتكوني علينا حنينه ...

وتجيبي الخير معاكي ...

ولا هتنزلي في النيل ...

وهناك يخصخصوكي

متستغربيش يا ميه ...

ما هو كلوا بيتخصخص ...

حتى الأحلام يا ميه ....

بقيت خلاص خصوصي ...

واللي معاه بواكي ...

ممكن ساعتها يحلم ....

أما اللي معهوش ...

فالحلم ما يلزموش ...

شايفه يا ميه حالنا ...

من بعد ما كنا أمه ...

عايشين على الأحلام ...

دلوقتي وف زمانا ...

خايفين حتى عليكي ...

ليرحوا يخصخصوكي ...

وتبقي سلعة غالية ...

عالمواطن الغلبان ...

حمادة زيدان

خبر موتني من الضحك

والله أنا عمري ما فكرت في يوم أكون لحوح , ورخم , وانزل بوستين في يومين , بس الواحد مرارته أتفقعت خلاص , وحاسس أني هاموت من المصايب اللي شغالة زي الدُش

في عز الحر.

النهاردة ماشي عادي يعني .. وبضرب عيني عالجرايد ولقيت خبر هههههههههههههههههههههه موتني من الضحك , موجود على صحيفة الجمهورية

الحكومة الله يعمر بيتها بتقول أنه الموازنة الجديدة الألوية فيها للفقراء , وفي نفس الخبر مضاعفة أسعار الغاز للمصانع ... طيب ممكن حد يفهمني يا ولاد الحلال هو لما أسعار الغاز تتضاعف ع المصانع مش نفس المصانع دي غصبن عنها هترفع أسعار السلع اللي بتتنجها , ده كمان غير باقي الخبر اللي يجيب شلل خماسي واللي بيأكد على تحمل الفئات القادرة عبء زيادات الأسعار طيب ازاى يا حكومة نصابين وانتوا رفعتوا سعر البنزين , يعني الغلبان زي حالاتي اللي كان بيركب ميكروباص لغاية القاهرة وكان بيدفع 15 جنية مش بعيد ألاقيها بكرة 30 وانا أصلاً مش موظف يبقي فين الأغنياء يا ولاد ستين كلب.

الخلاصة

خلاصة القول : أننا عايشين في بلد رئيسها نصاب كبير , ورئيس وزرائها حرامي , أحنا بقي شعب مالوش لزمة ونستاهل أكتر من كدة كمان ... يعني سياته رفع المرتبات 30%الدنيا كلها زغردت وقالت بلاش أضراب , ولما الحاجة زادت هتلاقي كل الناس بتقول أضراب ... يعني عملين زي العرايس اللعبة اللي بيحركها الرئيس من فوق

أنا مليت وزهقت ومش لاقي كلام تاني أقوله

جتنا خيبة كبيرة أكبر من خيبتنا

اللي أدهولكم باليمين أخدوا بالشمال

زمان قالوا في الأمثال ...

كان في شعب أهبل وعبيط وغلبان ...

وكان في عصابة رئيسها ألعوبان ...

كانت حاكمة كل الشعب ...

وكل الشعب معاها مهيس ...

ومش فايق ولا حتى مركز ...

جت الفكرة , وحطينا البذرة

كانت بذرة لشجرة كبيرة

كنا ساعتها هنعمل حاجة

بس الحاجة طلعت فالصوا

لما جه الزعيم ...

زعيم العصابة

وادا للشعب على قفاه ...

وهد الحلم

وراحت البذرة

وطارت الشجرة

قبل ما نسقيها

ولا حتى يوم قدرنا نرويها

والناس العبيطة

صدقت المسرحية

مسرحية الزعيم

واللي أداه باليمين

أهو خده بالشمال

وبقيت الناس مستنيه

حسنة قليلة

بس مش هتسعد ناس كتيرة

لأن الناس ماتت

في حرب أكتوبر المجيدة

وبقي في مصر دلؤتي

شوية غلابة

مترصصين عالحيطان

زيهم زي الدبان

ومالهمش لزمة تانية

إلا الضرب بالجذمة

ومعلشي بقي طولت

أصلي قرفت وزهقت

حمادة زيدان