Saturday, May 17, 2008

مش عاوزين النهاردة


النهاردة وانا باخد لفتي عالفيس بوك ... وبحكم أني جديد عالفيس بوك ... وبردوا بحكم أني أديلي فترة مش بسمع تلفزيون ولأسباب عادية يعني ... المهم أدخل في الموضوع

المهم لقيت جروب عالفيس بوك ... عليه صورة عمرو دياب علامة فاى أعتقد كده... أنا بصراحة مأخدتش ولا اديت , وقولت تلاقيهم العيال اللي بتحب الواد تامر حسني , ومكنتش بدخل على الجروب خالص.

جيت النهاردة دخلت عالجروب "ويارتني ما دخلت" لقيت الجروب سياسي كالعادة واللي صممه يا تري مصممه ليه !!!! طلع علشان أخوانا عمرو دياب غنى أغنية لمبارك في عيد ميلاده ... المهم بردوا ما أخدتش ولا ادايت بحكم أني مشفتش الغنوة

ودخلت بعدها بحسن نية والله أشوف الغنوة


وبسببها قعدت عالكرسي ومش عارف أقوم

قال السيد عمرو دياب بيقول عالريس أنه "واحد مننا" هو مين ده يا عمور اللي واحد مننا

يمكن يا جماعة "مننا" دي شعب تاني بيغنيلوا سي عمرو , ولا يمكن هو بيغني لرئيس تاني غير الزفت اللي حاكمنا , ولا يمكن عمرو وهو بيغنيها كان شارب سيجارة بنجو ...

المهم الله أعلم باللي خلى عمرو دياب يغني الغنوة

بس أنا لما سمعتها قولت والله أعمل بوست وانشر فيه الجروب

وطظ فيك يا عمرو

وابقي تعالا قابلني لو اشتريتلك البوم بعد كده

ملحوظة

"أنا عمري من يوم ما اتولدت اشتريت البوم لعمرو دياب"

المهم أعلنوها صريحة

أعلنوها مدوية

هنقاطع عمرو دياب , ومش هنسمعوا تاني

ولو عاوزنا نسمعوا

ممكن يعتذر في غنوة , تكون من كلمات عمنا "نجم" أو عمنا "علي سلامة" ويكون فيها أعتذار لكل السمعيه
لو عاوز الجروب أضغط عالصورة

11 comments:

majdelden said...

يا عم انت حاطط نقرك من نقره ليه مالك ومال ريسي ماتقعد في حالك
حاجه غريبه والله والي يغنيلو يغنيلو ريسي حبيبي وانا حر فيه افرده واكويه خليك في حالك هههههههههههههههههههه
هتروح السجن انت ودياب

FARFOUSH said...

يا عم حمادة انتى مش بتحب عمرو دياب عشان كدة انت بتناقض فيه علي طول ثانيا الرئيس ظالمنا اة بس مش معنى كدة تدخل عمرو دياب معاه ولا ايه علي العموم انا ليا حساب معاك بس لما اشوفك

Unknown said...

الغنا حرية وعمرو من حقه يغنى زى ماهو شايف وبعدين عمرو مش من الطبقات اللى بتحس بالظلم اللى موجود ولا بيعانى زينا علشان كده شايف الحياة زى الفل مع الريس

تقبل تحياتى

كيكى عوووووو said...

الى عايز يقول يقول....المهم الى فى القلب

بنت الاسلام said...

ياحمادة

الراجل برده محقوق

ماهو لا ايد شاويش بتطرقع علي قفاه

ولا زلطة ولا شوكة بتدخل في رجله وهو

ماشي حافي


ولا بطنه في نص الليل اتقامت عليه

وصرخت قالتله جعاااااااانة


ولا شال هم كيلو السكر و لاجزمة الولا ولا تعليم البت

مش حقه يغني له بس

ده حقه كمان يعمل له تمثال


محدش بيحس بينا غير اللي زيينا

بيعاني


تحياتي


ولاتقهر نفسك

يورو said...

حماده
انا مع بطه فى كلامها
دا واحد لقى راجل يهيئله المجتمع الى يقدر يعيش ويكبر ويعلى فيه وكانه حاجه ضروريه زيها زى الهوا والميه
فى الوقت الى العالم او المفكر او الدكتور ملوش ادنى قيمه
يبئا لى م يغنيلوش ويدلعه

Anonymous said...

عمرو دياب دا اصلا من يومه بارد
انا ولو انت عارف اني مليش في الجو دا
بس لو خيرتني هختار تامر حسني

وبعدين هي جات على عمرو

هيييييييييييييه

دووووووووونياااااااااااااا

تحياتي
و
محبتي

الدرعمي said...

سلام عليكم

يا عم متسيبه ياكل عيش ويسترزق

يعني حرام يزود رصيده في البنك ؟

آهي أغنية وهتروح لحالها

يعني هو الشعب هيقتنع بيها ويرددها ؟

أنا أكاد أجزم إن عمرو دياب مش حافظها

إيه رأيك بقى ؟

متمشيش ورا العيال بتوع تامر اللي بيتخفوا في السياسة

زي لما العيال بتوع عمرو اتخفوا في ستار الوطنية لما تامر اتكشف

وبقى كل واحد فيهم ناقص يمشي وحاطط على صدره علم مصر

واللي كان معاه شهادة إتمام الخدمة العسكرية كان بيتعايق بيها

وكأن تامر أول واحد يتهرب من الجيش

وبردو دلوقتي وكأن عمرو أول واحد يغني لرئيس

طول عمر الرؤساء والملوك والحكام بيغني لهم صفوة المغنيين

مكفرش يعني

بالمناسبة أنا أكتر واحد بيكره غنا تامر وعمرو

الاتنين أقبل العمى ولا أقبلهمش

بس الحق حق يا مولانا


تحياتي



آدم

مدحت محمد said...

ههههههههههههههه
تعرف انا عمرو بحبه اوى
وبحب اسمعه جدا

اما موضوع واحد مننا

انت متاكد انها للريس

هو ممكن عشان عمرو مش بيقعد فى البلد كتير مش عارف اللى حاصل فيها ولا حاجة

ولا انت قصدك ان عمرو مدفوعله ولا ايه بالظبط

Anonymous said...

ِوف ياحمادة ياخويا بغض النظر انى مش بطيق اشوفه ولو فضلت اعددلك فى عيوبه مش هخلص
بس هو مش بيعملها حب ماحدش عارف اللى خلف الكواليس ياحمادة كوابيس
بس لانه عايش ولا الملوك فى عهد الريس متقال اقصد مبارك يبقى يغنيله ويغنى لجمال كمان

Anonymous said...

حمادة نسيت انا ايمان صاحبة التعليق المجهول