أحلي هدية في عيد ميلادك

إلي كل المصريين أخوان ولا حتى مدرسين ...

خلاص يا ولاد العيد قرب ...

والعيد طبعاً هيكون سعيد ...

ده عيد ميلاد سيد الدنيا ...

وعيد ميلاده لازم تعرفوا كل الدنيا ...

تعرف أنه الشعب كل الشعب بحييه ...

وباللون الأسود هايغطيه ...

ما هو كلنا لابسينه من زمان ...

على ولادنا في كل مكان ...

شوية في قلب الميه ...

وشوية في الصعيد ...

ياللا يا شعب

ياللا يا ناس

قولوا وعيدوا وقوموا وهللوا ...

مش عاوزينك يا ريس ...

وفي عيد ميلادك الكام والتمانين ...

هانقولك متشكرين ...

خلاص كتر خيرك ...

مش عاوزينك ...

علشان خيرنا ...

أصبح خيرك ...

وفي عيد ميلادك ...

هانقدملك أجمل هدية ...

بس يارب تعجبك

دي هدية من كل الشعب

وهدية لكل الشعب

هانلبس أسود

وهانطفي النور

وهانولع شمع

ونطفي الشمع

من غير تورتة

ما هو مفيش دقيق

وحتى العيش

بقي طوابير

يعني ياريس أنسي التورتة

وخلي الناس في بيوتها تنام

يوم ميلادك

أخوان وكفاية ودكاترة

وشعب وأمه

هايريحوا في بيوتهم

بيجهزوا للأحتفال

يا عم حسني

يا ابو العيال

حمادة زيدان

حكمت المحكمة

وحشتوني أوي ... بس والله مش فاضي أكتب
علشان كدة جبتلكم من مدّونة مكتوب البوست ده
ويارب يعجبكم



المشهد الأول
من داخل أروقة قاعة الجنايات
حبلص داخل القفص يتحدث مع المحامي.....
حبلص: يا باشا انت ضامن أنك هاتخرجني من المصيبة دي !؟؟ يا باشا والله انا خايف , وسعاتك يعني مش مطمني...
المحامي : وانت خايف كدة لية ؟ يعني هي أول مرة تدخل فيها بيت خالتك , يبني دا انتا حيطان السجن لو بتعرف تتكلم , كانت قالت بحبك يا حبلص.
حبلص : يا باشا انت هاتقطمني , ما تلخص وقول لو هاتذفت على عين أهلي وهاتحبس قولي قبل ما اعرف من الباشا القاضي..
المحامي : يبني ما تخفش انا مش خرجتك قبل كدة ؟!! من بتاع خمس جنايات سرقة , وبتاع جنايتان تعاطي مخدرات!! ولا يعني سيبتك؟..
حبلص : أيوة يا باشا ما انكرش , بس سياتك بردة أتحبست علي إيدك الغالية في عشرين غيرهم..
وهنا دخلت مدام حبلص داخل القاعة وبأعلي ما فيها من صوت ..
مدام حبلص : يا سبعي , يا ضبعي , يا حبيبي يا خويا ...
بدأت كل القاعة تنظر إلي المرأة , كل من في القاعة من حريم بدأوا في التقرب إليها لتسكيتها , وفي هذة اللحظات أنطلق صوت الحاجب
الحاجب : محكمة
القاضي : نادي يبني على القواضي وخلصنا ..
الحاجب : حرفوش محمد حميدة
محامي تاني : حاضر عنه يا باشا
القاضي : أيوة يا سيدي قول ولخص ويارايت تنجز , الدنيا صيام والواحد مش طايق البدلة إلي عليه أصلاً.
المحامي التاني : يا باشا حرفوش متهم بتعاطي المخدرات , وانا مش هانكر أنه بيشرب مخدرات .
صوت حرفوش من القفص
حرفوش : الله يخرب بيتك يا أستاذ
القاضي : إخرس يا متهم أحسن وديني وأيماني هاحكم في قضيتك من غير ما اسمع المحامي.
المحامي التاني : يا باشا الراجل ده فعلاً بيشرب مخدرات , بس ممكن حضرتك تقولي واحد عايش هو ومراته , وسبعة من ولادة . وأمة واختين بنات في أوضتين من جوة بعض , وهو كل مرتبه 250 ملطوش قصدي جنية , يبقي هايعيش منين وهايكفي كل الجيش ده منين .
القاضي : إيه إللي انت بتقوله ده , والقضية مالها بكل ده , انا حد قالك عليا الشئون الإجتماعية ؟!!! ولا وزارة المالية , انت لا تتكلم في القضية لا ترحمنا من صوتك وتريح ...
المحامي التانى : يا باشا ما هو ده في صميم القضية , لو الراجل ده ما خدلوش حتة حشيش , ولا ورقة بانجو , قولي كدة سياتك هايعيش إزاى !! يا باشا الحشيش دلوقت مش مخدر وبس , الحشيش بينيم الناس علشان ما تثورش علي الأوضاع الزفت إللي عايشين فيها , يا باشا الحشيش المفروض الحكومة توزعة على بطايق التموين .
وقف وقتها كل الرجال والنساء داخل القاعة وبدأت النساء في"الزغاريد" والرجال في قول الله أكبر "ينصر دينك يا متر" وبدأ صوت القاعة يعلوا ويعلوا ويعلوا حتى
القاضي : حكمة المحكمة حضورياً بتبرأة حرفوش محمد حميدة , وحبس المحامي سنة مع الشغل لدعودته لأنتشار الخطيئة بين الناس...
الحاجب : حبلص عبده المدخ
المحامي الأولاني : حاضر عنه يا باشا.
القاضي : لخص يا متر , واتكلم في المفيد .
المحامي الأولاني : عيني يا باشا , بس حاضرتك ما تتنرفزش .
القاضي : انا كدة أحبك , قول بقي .
المحامي الأولاني : يا باشا حبلص متهم بالأدجار في المخدرات , والباشا الظابط بيقول أنه مسكه بالليل , وفي شارع عبده تعريفة , والشارع ده أصلاً مفيش فية ولا عمود نور , يبقي شافه أزاى , وكمان لما قبض عليه الباشا بيقول أنه كان سكران ومخدر , بالعقل كدة يا باشا في حد بيوزع مخدرات وبيكون مسطول , كمان يا باشا حبلص ما كانش في الشارع ده أصلاً , حبلص في الوقت ده كان بيتجوز من مراته التانية مدام فلة , وده سعاتك عقد الزواج ومكتوب فية الوقت وممكن أجيب المأذون يشهد بكدة .
وهنا أنطلقت مدام حبلص الأولي في الصراخ مرة أخري , ولكنها في هذه اللحظات بدأت في سب وقذف زوجها بدلاً من السواط عليه , حتى أن القاضي آمر برميها داخل القفص , وكان الحكم بتبرأة حبلص , وحبس مدام حبلص الأولي..
المشهد الثاني
من داخل مكتب الأستاذ المحامي الأولاني , يجلس المحامي على مكتبه وأمامه يجلس حبلص , ومدامته الثانية
حبلص : يا باشا مش عارف أشكرك إزاى , ربنا يخليك لينا , وفلة ما راديتش تسيبني أجي لوحدى وقالت لازم تشكرك بنفسها .
فلة : يا باشا ربنا يخليك لينا جوزى طلع من السجن , والغرابة اللي كان متجوزها أتحبست ياللهوي زي ما يكون هم وانزاح .
المحامي الأولاني : والله يا مدام لولا موضوع الجواز ده وأنه المأذون كانت زمته أستيك ما كناش عرفنا نخرجه منها أبداً.
وفي مفاجئة من العيار الثقيل , وجد حبلص والمحامي مدام حبلص الأولي أمامهم وبأعلي صوتها قالت
مدام حبلص الأولي : وانت فاكر نفسك خرجت , انت بتحلم يا أستاذ , أنا أعترفت عليك في كل مصايبك , وهاتدخل السجن هاتدخل , أنت والبت فلة وكمان الأستاذ المحامي .
وكما يحدث في كل الأفلام العربية , قام حبلص بمعاتبة زوجته , وفضحه لنفسه واعترافه بكل ما يخص تجارته للمخدرات والدعارة التي كان يقوم بها هو وزوجته الأولي وزوجته الثانية , والمحامي , وكما يحدث أيضاً في الأفلام دخل الضابط ومعه مجموعة من العساكر وقال
الضابط : أخيراً وقعت يا حبلص انت والمحامي ده أبو زمة أستيك
المحامي الأولاني : منك لله يا حبلص انت وبنات الكلب إللي متجوزهم , ياللا بقي شفلنا محامي يدافع عنّا .
انتهت
حمادة زيدان

يوميات شاب مرفوع مؤقتاً من الخدمة 3

الجزء الثالث

القمة العربية

المكان
قصر عابدين
الزمان
الساعة 5 فجراً
الحدث
اجتماع رئاسي موسع
أيوة يا شوية وزراء هلس .... صباحكم زي الفل بعون الله ... وأحلي نسمة حشيش تجمعنا بعون الله ع الصبح
"هه تحبوا نبتدي منين الحكاية , زي ما عبد قالها قبل كده؟ ... نبتدي بالعيال إللي مخبطوين ع القهاوي مش لاقين حد يلمهم؟... ولا بالبنات اللي مش لاقيه حد يتجوزهم , ولا بالاسعار اللي مولعة نار , ولا إيه ولا إيه ولا إيه ... الراجل اللي سبقنا أكل الأخضر واليابس زى الجراد ...... حسبي الله ونعم الوكيل
طبعاً كنت ده أنا ... ومعايا شوية العيال أصحابي ... بعد ما بقيت رئيس , وهما وزراء , زى ما انتوا عرفتوا "هشام" ثقافة ... و"محمود" أعلام ... والواد "طارق" وزارة الصحة , والمفاجأة بقي أمي ... شبطت فيا روحت مديلها وزارة التموين , علشان بتفهم في المطبخ قصدي التموين أوي .... المهم بدأت الأجتماع بالكلمتين اللي قولتهم وكان الدور على الوزراء يتكلموا ... بس يا تري إيه الخطة اللي هانمشي عليها ... طرحت موضوع الخطة والعيال الوزراء كل واحد قال كلمته وابتدي هشام
"بما اني يا ريس وزير الأباحة قصدي الثقافة ... فأحب نلعب قصدي تكون خطتنا هجومية ... يعني نهاجم الناس بالثقافة ... نعملهم أفلام ثقافي يا ريس كتير ... والله هايدعولنا ... وفيلم بقي لهيفاء على فيلم لدومنيك على فيلم للبت الموزة شاكيرا وهاتلاقي الشعب بيدعيلك ليل ونهار
يا سلام يا روح أمك ... عاوز الافلام السكس تبقي علني ... ولمين لهيفاء!!! عاوز الشعب يضيع أكتر ما هو ضايع ... الله يخرب بيتك , أحنا ممكن نوسع شوية الرقابة أو نلغيها عالفضائي ... واللي عاوز يروح مش أحنا اللي نجيله يا حمار"
أنا قولت الكلمتين دول ولقيت وزيرة التموين الحاجة أم مروان , راحت قايمة سك في وشي , وراحت صارخة فيا وقايله
"يا مقندل يا أبن العبيطة , عاوز تخلي الأفلام بتاعت قلة الأدب للشباب , طيب جوزهم الأول , بدل ما تسيب القنوات كدة وتلاقي الدنيا هاجت عليك , والشباب والبنات بقيوا ولا مؤاخذة يعني "تييييييييييييييييييييييييييييييييت" يا ابني يا حبيبي حاول تتصرف للشباب في شغل الأول وبعدين هما هيتجوزا ومش هايحتاجوا الثقافة"
"والله كلامك معقول يا مه , طيب هانشغلهم أزاى ومنين ده أبن تييت وتييت سايب البلد كده فاضية وبايع البلد للأجانب"
لقيت العيال بدءوا يهتموا شوية راح محمود قايل
"أحنا نعمل زي عبد الناصر ... وانت تقف وتقول"
"لقد قررنا تأميم جمهورية مصر العربية بلداً وطنية مصرية"
"هاتلاقي الناس تقعد تهتفلك وتبقي بطل يا معلم ... والدنيا كلها هاتتكلم عنك"
فكرة الواد عجبتني ... بس صعبة ... هاتصل بالجيش واشوف الأخبار الأول ... علشان ما اخدتش على قفايا زي عبد الناصر"
"ألو"
"أيوة ياريس"
"أنت ياد يا مشير أخبار الجيش إيه"
"ياريس الجيش زي الفل , والجنود بتدعيلك ليل نهار ... والطيارات ماليه المطارات الحربية ... والدبابات زي الفل ... وكله في التمام يا زعيم"
"خلاص هاتكل على الله وهأمم"
أنا نويت أمم بس خايف التاريخ يعيد بعضيه وألاقي العدوان الثلاثيني مش الثلاثي ... على العموم ربنا يستر ... طيب أدي البطالة وحلناها ... في أيه تاني السياسة والأحزاب والمصايب السودة اللي باقية , أنا فيها زي الحمار مش بفهم منها حاجة ... أنا لازم أخد دورة على طول .... فضيت الاجتماع ... وزعط العيال أصحابي بس الواد طارق كان عندوا اقتراح أول ما قالوا نزلت عليه أمي بالشبشب فوق دماغه .... البيه كان عاوز يوزع حشيش مع التموين , وانا طبعاً كنت موافق بس أمي بهدلتنا ... ونهيت الأجتماع وقلت أعمل أول قمة عربية ... علشان أتعلم السياسة من زعمائها ... مسكت التليفون الدولي بتاعي واتصلت بالرؤساء نفر نفر وقررنا القمة العربية بعد أربع أيام ... وكان موضوعها الرئيسي
"أزاي نحرر بلدنا"
يوم القمة ... لبست البدلة الشيك بتاعتي الجديدة ووقفت في المطار مع ماما الحجة ... واستقبلنا الرؤساء واحد واحد لما رجلي خربت من الوقفة ... ركبنا العربيات وعملولنا زفة ولا زفة الأفراح ووصلنا لقاعة المؤتمرات اللي عملتها جديدة في الأزهر وبدءنا الاجتماع العربي الأول
أول حاجة شدة انتباهي في الزعماء هو حجمهم ... كلهم حجمهم عامل زي براميل الطرشي ... وكروشوهم قدامهم أمتار المهم كبرت ونفضت للأحجام ما هو انا لسه صغير ولما أكبر زيهم أكيد هايطلعلي كرش ... قعدنا عالتربيزات , لقيتهم مفيش حد طايق حد , كلهم كارهيين بعض , بتوع الخليج بيحتقروا المغرب العربي ولبنان , والتانين مش بيحترموا الخلجان ... الدنيا هاجت وولعت أول ما جبت سيرت فلسطين ... لقيت الكل بيرمي بالتهم على بعض , والكل بيتهم بعض بالعمالة , والكل فاكر نفسه بطل قومي , حاولت أفهم مين الغلطان معرفتش , حاولت أفهم منهم حاجة ولا عرفت , قرفت منهم وزعقت وركبتني الشهامة والمجدعة وروحت شاخط فيهم وقايل
"انتوا مش بتبطلوا أكل في بعض ... عاملين زي السمك كده ليه ... أحنا مجتمعين علشان نحرر أرضنا , كلنا عندنا أحتلال وانا أول واحد هاحرر وطني ... بس عاوز أعرف يعني إيه سياسة؟"
لقيت الكل قعد يضحك ... وفي منهم وقع على الأرض وبقي عامل زي البطيخة ... ولقيت الكل في نفس واحد بيقول
السياسة يا ريس أنك تاخد على قفاك وماتقولشي آه ... وانك تسرق اللي تقدر عليه واللي ما تقدرش عليه تحاول تسرقوا .... وانك تسمح للناس تشتمتك وتسمح لنفسك تعتقلهم .... وانك تدرب ولادك على السلطة من يوم ميلادهم ... وانك تعرف أنه في كبير علشان تحترموا ... وتعرف أنوا أنت صغير وعمرك ما هاتكبر ... وتعرف أنوا دستور بلدك ده زي الأندر بتاعك لو قلعتوا "تيتتتتتتتتتت" هايبان" وتعرف أخيراً أنوا الناس لو أخدت منك الحرية هاتلطشك على قفاك وتزيحك بره السلطة
يا ولاد الأبايح هي دي السياسة !!! أنا كنت فاكرها أحزاب وقوة عظمي وبتاع ... الله يخرب بيت أبوكم ... أنا خلاص هاتكل وهأمم وهازعط وهاعمل ديمقراطية آه ديمقراطية حد عنده مانع , ده غير الجيش اللي هايحارب ... يعني إيه مش عاوزني أحارب لأ دانا هاكسر عضم اللي هايقوم تلت التلاتة كام مع أهلي أنا بقي مفتري ... وإن كانت الست أمريكا كبيرة ف "........................." ربنا أكبر منها .... قمت من الاجتماع وطبعاً متقفناش على حاجة ونصهم أتهمني أني بحشش وهاودي الشعب في داهية صدام , والباقي أعتبروني عيل بريالة , أما أنا فعرفتهم على حقيقتهم , شوية بقر آه والله بقر , وكل اللي يهمهم يملوا كروشهم فلوووووووووووووس , خلصت الاجتماع من هنا ولقيت الواد "حسبوا" فتوة شارعنا اللي بقي وزير الحربية يكلمني عالموبيل وبيقول
"ألحق يا ريس .......... الأمريكان ولاد تييييييييييييييييييييييت أعلنوا الحرب علينا , والمصيبة السودة أنه الجماعة الكلاب اللي عندك أعلنوا موافقتهم على الحرب"
"يبني في إيه أنت ضارب بانجو ولا إيه أمريكة مين , وحرب مين , وكلاب مين , يا حبيبي محدش يعرف حاجة عن اللي ناوي عليه محدش عرفوا , والجماعة الرؤساء لسه هنا مسافروش حتى دول لسه في الاجتماع , وبعدين أزاي يحاربوني وانا منهم"
"ألو"
"ألو"
"ألو"
"أنت فين ياد يا وزير .... مش بترد ليه؟"
استنيت كتير أقول ألو , ألو , ألو ومحدش عبرني ... وبعدها بشوية لقيت غرفة الاجتماعت أتقلبت والجماعة الزعماء العرب جايين ومعاهم كام ظابط أمريكاني وقالوا كلهم في نفس واحد
"أنت مطلوب القبض عليك ... عاوز تعمل ديمقراطية يا روح خالتك ... عاوز شعبنا يثور علينا بسببك ... عاوز تأمم البلد يا عيان , فوق من أوهامك , فووووووووووووووووووووووووووووووق"
"فوووووووووووووووووووووووووووووووووووووووووووق"
"فوووووووووووووووووووووووووووووووووووووووووووق"
"إيه أفوق من إيه ,أبعدوا عني يا ولاد "..........." أنا كشفتكم على حقيقتكم , أنتوا مش رؤساء أنتوا حرامية , لازم العالم كله يعرفكم , لازم أحبسكم , جنوووووووووووووودي , وزرائي , ماما ألحقيني يا ماما"
يتبع

نظام عامل زي التور الهايج

اللي حصل النهاردة فوق المعقول , وفوق المتخيل , وفوق المنطقي , أنا طبعاً مش أخوانجي ولا أحب أكون , بس اللي حصل كان زيادة أوى , يعني واحد باحترام البشمهندس خيرت الشاطر يتحبس 7 سنوات , وقدامه واحد زي هاني سرور يطلع براءة وفي يوم واحد , ده يتسمي إيه غير ولا مؤاخذة تيتتتتتتتتتتتتتتتتتتتت علشان صايم ومش عاوز أشتم ولا أكون أبيح , والله حرام نظام وسخ بيحكمه واحد وسخ وشوية وزراء تيتتتتتتتتتتتتتتت .

على فكرة النظام خلاص قفلها ضبة ومفتاح قدام الأخوان , وسؤالي دلؤتي للشعب المصري , اللي عايش في كوكب تاني بعيد أوي عن مصر , السؤال بقي

يا شعب يا مداس , يا غلبان , ياللي مش لاقي تاكل , مين هايمثلك في مجلس الشعب من بعد الأخوان , مين اللي هاتحارب علشان تدخلوا المجلس الموقر من بعد الأخوان ؟ هاتعمل إيه يا شعب سوري في اللفظ ملكش لزمة إلا في السواط والتعديد , خلاص يا شعب الحضن الطيب بتاعك بح وخلاص ومفيش , ومعدش عنده فعلاً إللي يدهولك !

هه هاتفوقوا أمتى ويطلع منكم شوية ناس تانية تحرك الشعب المسكين ده وطلع منوا شوية ناس تانية ممكن يعملوا حاجة في النظام المتوحش ده , يا شعب مفيش أخوان تاني , هايطلع منكم أمتى ناس بتحب البلدي بجد وعاوزين يعملوا حاجة , فوقوا بقي , ده احنا سبقنا أهل الكهف في نومتهم الطويلة .

وعلشان المناسبة السودة دي , واليوم الكحلي ده , هابعت للريس وامثاله القصيدة دي أو الخاطرة دي , أو البتاعة دي , علشان محدش يجي يقول دي مش شعر أوكيشن تعالوا بقي نهديها للريس

الزعماء العرب

لمّا تّلاقيه دايماً بيزعق...
وتّلاقى صوته عالى عالفاضى...
وتّلاقيه على طول متّفْشّخر...
بحضارة جدودة...
ف الماضى...
وتلاقى نفسهُ عامل مؤمِن...
وهو من جوآه عآصىِ...
وتّلاقيه بيبيع ف اصحابهُ...
ومِش بيرحم حتى أهلُه...
وتّلاقيه بَره يعِنِى عليه...
عامِل قُطة ونايمة كمان...
وجوُه بلآدهُ عامل زِى الأسد...
كّلامه أوامر...
وأوامرهُ فروض...
وعايش ف دور المّلك...
وهو الألّه عالأرض...
ساعتها....
وساعتها بس...
تعرف إنك مع...
الزعمآ العرب

حمادة زيدان

خبر زعلني أوي

نفت مديرة المكتب الاعلامي للفنانة اللبنانية فيروز الخميس أنباء تداولتها مواقع على شبكة الانترنت عن إقامة حفل لها في مصر.
وقالت ضحى شمس مديرة مكتب فيروز إن "بعض وسائل الاعلام ومواقع الانترنت تقوم بالترويج سنويا بأن السيدة فيروز ستقيم حفلا غنائيا في مصر وقد ذهبت بعض هذه المواقع خلال العام الجاري إلى حد التجرؤ على تعيين تاريخ لاقامة هذه الاحتفالية الغنائية المزعومة إلى جانب تحديد مكان إقامة الحفل وتحديد أجور طائلة زعموا أن فيروز طلبتها أو تقاضتها لقاء إقامة مثل هذه الحفلات".
وأكدت شمس أن "أحدا لم يدر إطلاقا بمثل هذه الامور إلا أولئك الذين قاموا بتأليف هذه الاخبار ونشرها".وقالت إن "المكتب الإعلامي للسيدة فيروز مهتم بأن يؤكد ان احدا من مصر لم يتصل بفريق عملها المكلف بالتفاوض حول حفلاتها كما يهم المكتب ان ينفي نفيا قاطعا ان تكون هناك حاليا اي نشاطات للسيدة فيروز في مصر".
وتمنت شمس أن يتأكد "الزملاء الصحفيون ومحررو وكالات الانباء ووسائل الاعلام كافة ومن ضمنها مواقع على شبكة الانترنت من أي أخبار قبل اذاعتها كما تنص اصول المهنة خصوصا وانها حين تنشر بهذه الطريقة تسيء إلى فيروز والى الصحافة المصرية التي تفقد مصداقيتها امام جمهورها حين تروج ولو عن دون قصد لاخبار عارية عن الصحة".
وكانت عدة صحف ومواقع على شبكة الانترنت قد أشارت إلى إقامة حفل للسيدة فيروز في مصر مقابل بضعة مئات الالاف من الدولارات ووصل بعضها الى مطالبة فيروز بمليون دولار لاقامة مثل هذا الحفل في مصر.
د ب ا

أنتهى الخبر

وانتهت مع الخبر كل أمالي إني أشوف السيدة العظيمة فيروز بتغني في مصر

أنا والله كنت ناوى أعمل فيها قرد علشان أحضر الحفلة ... بس الظاهر حتى الفن المحترم مش مكتوبلنا نشوفوا , يا مسئولين مصر عن الثقافة , هي مش مصر زي ما بتقولوا أم الدنيا !!! أزاي تبقي أم الدنيا ومفيش مسئول يروح لبنان ويطالب بحفل لأعظم فنانة في الدنيا , والله حرام عليكم , حرموتونا من كل حاجة حتى الفن المحترم , وهانيالكم هيفاء ودانا , وأمثالهم من ذوات الصدور العامرة , والله حق السيدة العظيمة فيروز ما تخطيش مصر , طول ما الحكومة الوسخة دي موجودة .

وهو ياللا كمالة أحباط

لو كنت زهقان أو قرفان فكك وتعالا عيش

أزيكم

أنا طبعاً بعتذر ليكم واحد , واحد , وواحدة , واحدة , علشان تأخيري في يوميات شاب مرفوع مؤقتاً من الخدمة .... بس أعمل إيه الجماعة الفشلة اللي بيتجوزوا زادوا أوي , يعني بعد ما أرتحت من فرح أخويا , لقيت الواد صاحبي الأنتيخ هيتجوز , يعني والله هما بيتجوزوا وانا طالع عيني معاهم , علشان كده فتشت شوية في مدونة مكتوب بتاعتي طبعاً , لقيت بوست دمه خفيف كنت كتبتوا من فترة كبيرة طبعاً , وعلشان مش فاضي أكتب يوميات شاب , بهديلكم البوست ده ويارب يعجبكم .

بص يا سيدى , سيادتك قرفان من الدنيا , ومش عاوزها , ومش عاوز تكون فرد فيها , تعالا هاقولك شوية نصايح , خدهم منى وارميهم فى البحر.
أولا : عيش اليوم بيومه , فكر فى بكره آه , وظبط لبكره آه , بس ما تنساش النهاردة , وتفضل شاغل نفسك ببكرة , يعنى إحنا فى النهاردة وبكرة لسة مجاش , يبقى هانعيش النهاردة , ونعيشه كويس , وبكرة هايجى وهايكون متظبط بردة , لو فكرنا فيه وظبطناله كويس.
ثانيا : حلمك لازم يكون كبير , وطبعاً وأكيد طول ما انت فى "مصر" أنسى تحقيق حلمك , يبقى هاتعمل ايه "هاتولع فى نفسك مثلا" ولا تتنتحر , لو حلمك الكبير ما عرفتش تحققه يبقى أعمل فيها "حرباية" واتكيف مع الظروف , يعنى كان نفسك تكون , صحفى , مش هاتفرق كتير لو بقيت "نقاش" إيه حد بيتهمنى انى بهزر , طيب ايه الفرق بين قلم الصحفى وفرشة "النقاش" ولا حاجة قلم الصحفى "صغير" والفرشة كبيرة , هو دة الفرق , ولو كان حلمك الكبير تبقى رئيس جمهورية مثلا , ما فرقتش كتير بردة , بين رئيس الجمهورية و"الحرامى" آه الحرامى , يعنى انت ما عرفتش تكون رئيس جمهورية , يبقى أقولك تعمل ايه.
اجمع كام واحد من الفتوات الجامدين , ودور بيهم عالبنوك , والبيوت , والنوادى , وكل مكان فى مصر , وانزل سرقة ونهب , ساعتها بس هاتحس أنك رئيس جمهورية .
ثالثا : فى كلمة مشهورة ومشهودة لفريق
mtm
بيقولوا فيها "اهرب من اللى خانقك جوه عقلك .. اللى مخلى اللى فى قلبك مش باين على شكلك" يعنى خليك صريح مع نفسك , واعرف امكانياتك , وحدد هدفك كويس , واعرف كل الوسائل الى هاتخليك تحقق هدفك , وبما اننا فى مصر , فهدفك لن ولم يتحقق إلا بالفلوس , يعنى السيد الوالد ربنا مديله , افتحلك مكتب اتصالات , واقعد عاكس فى البنات اليوم كله , ولو مافيش فلوس , يبقى ما تحلمش احسنلك , وعيش العيشة اللذيذة اللى هاحكيلكم عليها حالاً.
لو مفيش فلوس , تبقى انت ملك , بص فكك من الحوارات الفاشلة بتاعت الجواز والاستقرار وبناء الوطن , فككككككككك , وخليك واد لذيذ كدة , كل يومين امشى مع واحدة , وعيش وعايشها معاك "بس أوعى تقل آدبك" تخليك محترم , وتفهمها من الأول "أنه مفيش جواز" يعنى تسالى .
طيب مفيش وزز , أو بنات , سهلة ياعم , هو انت لو عشت من غير بنات هاتموت , أبداً , بردة هاتعيش , يبقى الحل "حب من طرف واحد" يعنى خلى بنت حلوة "مُزة" وحطها فى دماغك , واقنع نفسك انك بتحبها , واقنع نفسك بردة انها بتحبك "خيال فى خيال" يعنى مش حقيقة , وممكن تنفض خالص من مشوار البنات الخايب دة.
رابعا : حاول تدور على أى فرصة علشان تخلع من البلد دى , ونصيحة منى سيبك من الخليج , مش عارفين السيد بوش ناوى على مين , ولا امريكا يمكن تتمسك إرهابى , ويطلع عين أهلك , طيب ممكن تفكر فى , البرازيل , الأرجتين , أو مورتانيا , ممكن الدول دى تلاقى فيها لقمة عيش , بالذات أنها دول داخلة باب الديمقراطية من اوسع أبوابه .
خامساً : عيش زى ما تكون مش عايش , نفض , وكبر , وطنش , واعمل عبيط , عن كلام أمك وهى بتقولك "يامدهول هاتفضل فى البيت ليل ونهار" ولا كلام أبوك "يا ابنى انزل اشتغل اى حاجة خليك تتقندل وتتجوز" اه كبر لكلام ابوك وامك , وخليك بااااااااااااااااااااارد , وربنا خلقلنا أذنان ليه , واحدة نسمع منها , والتانية ننفض منها .
سادساً : أعرف الخطوات العملية لهدفك , مع البحث عن أقل الوسائل المادية لتحقيق الهدف , لو عاوز تبقى حرامى , ممكن تدرب نفسك عليها بطريقة سهلة جدا , "اتفرج على مجلس الشعب" وشوف أعضائه واتفرج على "مجلس الوزراء" الموقر , أو ممكن تتفرج على "القصر الجمهورى" كل مكان من دول فيه أساتذة فى السرقة والنصب والاستهبال على الشعب .
أما لو عاوز تكون مهندس شاطر ومحترم , أو دكتور "جيولوجى" أو صحفى محترم , ممكن تتفرج على المعتقلات , هاتلاقى كتيييييييييييييييييييييير أوى ,
ونصيحة منى فكك من الجماعة دول , مالهمش مستقبل , وخليك فى السرقة أفضل , بس بشرط "لما تسرق" اسرق بنفس , يعنى مليارات , أما كنت معفن وسرقت كام الف , هاتتحبس , وهايطلعوا عينك. وهاتدخل السجن , لكن لو سرقتلك كام مليار "هاتلاقى الدولة بتتفاوض معاك علشان ترجع" فاهم لما تسرق , خلى المبلغ كبييييييييييييييييييييييييير .
دى شوية نصايح , أخدت بيها براحتك , ما أخدتش بيها بردة براحتك , وربنا يسهلك وتطلع من زعلك .
وفى النهاية , عيش حياتك , وواعى تتبعنى وتسرق , انا كنت بهزر معاك , اما فى البرود والتناحة مع البيت , دى بقى خليك على طول , وربنا يسهلك , وتعيش باااااااااااااااااااااااااااارد.
بهزر والله يا شباب ويا بنات علشان محدش يزعل

حمادة زيدان

هي البداية يا سادة

النهاردة كان الأضراب ... والنهاردة كانت المجزرة ... النظام تحول إلي وحش أعمي كان بيخبط في كل الناس لدرجة أن قناة البي بي سي ذكر مبعوثها أن الداخلية تقبض على كل الأشخاص اللي بيلبسوا أسود ... المحلة النهاردة أثبتت أنها بلد الرجال ... واللي حصل يوم للأضراب مكنشي بأيد رجالة المحلة , ولكنه كان بأيد كلاب الحكومة اللي سابتهم يكالوا في الناس الغلابة, ... مارو كلمتوا من شوية بيقولي المحلة والعة ... ومجازر بمعني كلمة مجازر بتحصل هناك ... والقاهرة أعتقلوا فيها ناس كتير أوى ... والمنيا عندنا الأمن أقتحم معظم الهيئات وأخد أسماء الناس اللي غابت عن أشغالها ... ده غير أنوا الأمن كان مغطي شوارع المنيا كلها ... ده غير الأسكندرية ومعظم محافظات مصر ...

الخلاصة يا جماعة

الأضراب نجح ... ونجح فوق ما كنا نتخيل ... وكانت ضاربة جامدة على قفا النظام وصرخة شارك فيها الشعب المصري المقهور ... ولم يشارك فيها الأخوان "................" طبعاً ما يستاهلوش باقي اللقب لأنهم مش بيمثلوا حد من المسلمين دول بيمثلوا بس أهوائهم الخاصة ... المهم مش وقت أخوان ولا زفت ... النهاردة كانت بداية الثورة , وأول مسمار في نعش مبارك الأب ومبارك الأبن وحزبهم الملعون

أعلنها

خلاص هو ده وقت الأضرابات المتتالية .... لازم كلنا نتحرك واللي هايتحبس ولا هايتصاب ولا حتى هايموت ... كلوا فداء مصر , مصر خربت يا مبارك , مصر خلاص بقيت خرابة كبيرة والناس بتبيع في لحمها علشان تاكل , خلاص جه وقت التغيير , النهاردة الأضراب نجح وبكرة أي أضراب تاني هاينجح

قوم يا شعب واتحرك

بلدنا وبنحبها .... ومش هانبطل نحبها ... وانت يا مبارك أنت واصحابك الحرامية سيبونا بقي في حالنا ومتنسوش تاخدوا الأخوان المسلمين معاكم .... مش عاوزينهم ولا عاوزينكم

في النهاية ان شاء الله بدعوا كل مصر للأضراب يوم 2 مايو يعني بعد عيد العمال بيوم علشان يكون أفضل أحتفال بعيد العمال

وتسقط الحكومة الفاشلة

ويسقط حسنى مبارك

ويسقط الحزب الوطني

ومعاه الأخوان المسلمين

الصور منقولة من مدونة ياللا نفضحهم

منقولة من مدونة جيم أوفر "محمد مارو"

منقولة من مدونة "مصر" أحمد الجيزاوى"

في النهاية تحيا مصر

تحيا مصر

تحيا مصر

تعديل

الأضراب أن شاء الله يوم 4 مايو

علشان يكون أحلى هدية لمبارك الأب في عيد ميلاده