موقف كان لازم أحكيه

أزيكم

مش كويسين الحمد لله ... المهم أنا وصلت للصعيد والحمد لله بعد فترة كنت فيها في القاهرة بعمل شوية حجات ربنا يتمها في الآخر على خير ... المهم وانا نازل أحجز القطر من محطة الجيزة أنا وصديقي وبلادياتي هيثم الدهشان حصلنا موقف صغير كان لازم أحكيه .

خير اللهم أجعله خير على أساس أني لسه صاحي من النوم يعني الموضوع وما فيه أننا قابلنا تلاتة شباب من ليبيا زى الفل سألونا عن محطة رمسيس أو زى ما هما قالوا محطة القطر لأنهم كانوا عاوزين يروحوا الأسكندرية أول بصراحة ما عرفت أنهم عرب والله قولت أنا وهيثم مش هاينفع نسيبهم لأنهم ببساطة عرب ده أولاً وثانياً وده المهم "صورة مصر" والله غصب عني لقيتني بفكر في صورة مصر قدام 3 شباب جم من بلدهم يتفسحوا وطبعاً عرفت منهم بعد كدة أنهم كانوا فعلاً في محطة رمسيس والناس ماشاء الله عليهم قعدوا يشتغلوا فيهم لغاية ما وصلوا لمحطة الجيزة وهما مايعرفوش !!!.

المهم سألنا على ميعاد قطر في وعرفنا أنه هايكون كمان نص ساعة أخدنا المترو اللي عجبهم أوى وكان في مشهد ضحكت من قلبي لما واحد منهم وضع التذكرة في المكنة ولقي التذكرة أتسحبت راح أتخض منها لما اتسحبت منه ... روحنا طبعاً نحجز التذاكر وطبعاً الراجل اللي بيقطع التذاكر أول ما عرف أنهم عرب من لهجتهم كان المعفن عاوز يلابط عليهم في جنية!!! أه والله جنية ويقول للشاب أنت أخدت الجنية المهم اللي أكتشفته واتصدمت منه أننا بقينا شعب كل همه يمتص دم أي واحد سايح عربي كان أو أجنبي مش بتفرق كتير يعني الشباب دول حكولنا على مواقف كتيرحصلت من أول لحظة نزلوا يتفسحوا في أم الدنيا !!! لناس زى الفل بتشتغل فيهم من سواقين تاكسي إلي ناس عادية يسألوهم ما يجاوبوش مظبوط يعني الخلاصة محدش كتير في مصر بيراعي أسم مصر وفي الأخر يزعلوا لما واحد سعودي يعمل أغنية يشتم فيها أم الدنيا !!!

في النهاية مش عاوز واحد يجي يستهبل عليا ويقول أني فرحان بأغنية الشاب السعودي ... أنا طبعاً زعلان ومدايق جداً مش من الشاب السعودى لا من المصريين إللي خلوا صورة مصر تبقي بالمنظر الاسود والمطين بالطين ده.

معلش طولت عليكم بس كان أحكي علشان ما اتخنقش واموت

حمادة زيدان