الأسعار ولعت والناس عادي يعني

النهاردة يا جماعة وزي كل يوم لما بكون في المنيا بحب أنزل السوبر ماركت أشتري أنا لوازم البيت من رز ومكرونة وصابون وجبنة وأي مصايب تانيه يكون البيت عاوزها .. المهم وقفت مع صاحب السوبر ماركت شوية بحكم المعرفة يعني ... وقعدت أسأله على أسعار الحجات إللي كل الناس مش ممكن يستغنواعنها ولقيت عنده مع الأسف أجابات صعبة أوى ومحزنة ومخزية ومحبطة وتعالوا نشوف نسبة الزيادة.

المكرونة .... من كام شهر ممكن نقول شهرأو أتنين أوتلاتة أو أقل كانت ب جنية وربع بس الكيس اللي هو 400 جرام فقط دلؤتي نفس الكيس وماتتخضوش ب 2 جنية وربع يعني زاد الضعف تقريباً وفي أقل من كام شهر .

الرز .... الرز يا جماعة كان تمنه من كام شهر والله 2 جنية دلؤتي ما شاء الله ب 4 جنية يعني زاد 100%100 حتة واحدة .

السمن ... وبحكم أنه عندنا في البيت سمن بلدي والسمن بتاع الصفايح مش بنجيبه كتير بس عرفت أنه زادت الروابي من 11 إلي 19 ونص يعني قربت على 100%100 زيادة هى التانية .

والزيت نفس الزيادة والسكر والصابون والفول المدمس والمفاجئة الكبري زيادة العدس من خمس لحاليح إلي 10 لحاليح حتة واحدة يعني زاد بردوا بنفس الزيادة , طبعاً كل ده غير موضوع العيش إللي أتكلمت فيه مروة الزارع ... الخلاصة هذا هو حال المصريين في الألفية الجديدة ومع حكومة نظيف ومع الأب الحنون لكل المصريين بابا "حسني مبارك" أطال الله في عمر سيادته وقصر في عمرنا أحنا علشان يعجب سعادته.

نيجي بقي لكلمة السر عند أبوكم حسنى مبارك .. يعني استنوا أي خطاب لسعادته وأول ما يقول "محدود الدخل" أعرفوا وتأكدوا أنه الأسعار هاتولع تانى يوم دي بقي فاكرين ناصر لما قال "ديلسبس" لما جه يأمم القناة هو مبارك أتعلمها بس بيقول "محدود الدخل" وبردوا علشان يأمم جيوب المصريين وهو في الآخر كلوا تأميم وخلاص.

أنا مش عاوز أتكلم تاني علشان ملييت وقرفت وزهقت وهاعيط خلاص

حمادة زيدان