يخرب عقلك يا رباب

ليلة أمبارح كانت ليلة غريبة فعلاً ... أولها كان نكد بشكل غير طبيعي "ومش هاقدر أقول أسباب" المهم بجملة النكد مسكت رواية أختي العزيزة رباب كساب قفص أسمه أنا المهم مسكت الرواية وانا حالتي النفسية في الأرض وقعدت أقرا فيها ...
وسطر ورار سطر وكلمة ورا كلمة لقيت حالة النكد اللي كانت عندى زادت أوى وعدت أوى ولقيت رباب عملت فيا حالة غريبة .... أنا مليش في النقد أوى بس الرواية فعلاً بتعمل حالة غريبة في أي حد يقرأها ... هاحكيلكم قصتها الأول عالسريع كدة .
الرواية بتبدي مع وصف مفصل لحي من الأحياء الفقيرة اللي بيكون عايش فيها بطلا الرواية صفاء وفتحي .... الاتنين بيموتوا في بعضهم من صغرهم ولكن صفاء طموحه أوى وطموحها بيزيد بشكل فظيع وبترسم كويس جداً لطموحها بتتعرف على ولاد الناس الأغنية علشان توصل معاهم وبيكون من شلتها الجديدة ولد أسمه عماد بيحبها هو التاني مع أنه عارف انها بتحب فتحي بس بيوصلها لوالده اللي بيكون محامي كبير وبتفضل صفاء ماشية بطموحها وبيزيد الفارق بينها وبين حبيبها فتحى اللي بيصبح هو عقبتها الوحيد علشان تصل لطموحها لأن فتحى هو التاني طموح بس في مهنة أخرى وهى النجارة وبتستمر الحياة وبيستمر فتحى وصفاء في قصة حبهم لغاية ما صفاء بتعزم فتحى يشوفها في المحكمة في القاهرة وفي مرافعة كبيرة وفعلا بيروح فتحى وبيفاجئ أنه حبيبته كبرت أوى بيقرر وقتها أنه الأنفصال هو الحل الوحيد لأنه وعلى الرغم أنه خريج نفس الكلية بس هو أهتمامه الوحيد كان بالنجارة وكانت هى وعلى الرغم من حبها ليه كانت منتظرة الخطوة دى لتستمر في طموحها الذي لا ينتهي وفعلاً الحياة بتنقلها من خطوة لخطوة أكبر منها لغاية ما بيمر بيها العمر وفتحى بيتجوز وهى بتقابل شخصيات كتيرة وكلهم بيحبوها بس هى مش بتحب غير فتحى ونفسها طبعاً .... في النهاية فتحى زوجته بتموت , وطبعاً بيروح علشان يتجوزها وهى بتوافق ... وقتها حسيت أنه الرواية أخيراً هاتبتسم تانى لكن أزاى تبتسم وفى روائية غاوية تنكد على قرأها في الفرح ووسط الفرحة بيموت فتحى وبيتقلب الفرح جنازة وبتنتهي الرواية أنه صفاء بتختار أنها تربي ولاد فتحي وتعيش على ذكراه....
الرواية رومانسية أوى جميلة أوى .... ميرسي رباب على هديتك الجميلة دى واتمني أشوفها فيلم ينكد على كل البشرية زى ما انتى نكدتي عليا .....
وفي النهاية
منك لله يا رباب